Paraqitja e deputetit të LPK-së, Emrush Xhemajli, në seancën e Kuvendit të Kosovës, të mbajtur më 26 janar 2005

I nderuari Kryetar,

Të nderuar kolegë deputetë,

Të nderuar përfaqësues të Qeverisë,

Lëvizja Popullore e Kosovës do ta votojë Projektligjin e paraqitur nga Qeveria Për të Drejtat e Pjesëtarëve të Luftës së UÇK-së, të familjarëve të dëshmorëve dhe të viktimave civile të luftës.

Me këtë ligj Kosova fiton shumë jo vetëm në fushën e humanizmit dhe të larjes së borxhit dhe plotësimit të standardeve ndaj qytetarëve të vetë, por  me këtë fiton shumë paqa dhe qetësia sociale në Kosovë. Me këtë ligj fillon koha e vlerave shoqërore, kodi i sjelljes dinjitoze në shoqëri dhe e shpresës për vendin tonë. Me këtë ligj instituconi më i lartë i vendit do të tregonte se din të nderojë dhe të përkulet para atyre që dhanë veten për të mirën e përgjithshme.

Me këtë ligj Kuvendi i Kosovës është vonuar së tepërmi andaj duhet aprovohet dhe të kalojë në zbatim menjëherë. Nuk e vlenë të diskutohet për lëshimet mangësitë ose teprimet në ligj, megjithëse ato mund t'i gjenden, dhe në emër të kësaj të vonohet më tej. Me rëndësi është të fillohet menjëherë.

LPK ka vërejtje serioze në këtë Projektligj. Ai favorizon juristët e inkriminuar në sistemin e represionit në regjimet e kaluara.

Në Nenin 25 nën f).

Nuk mjafton që prokurorët e ardhshëm të mos kenë marrë pjesë në ligjet diskriminuese që parashihet në nenin 25. f. me të cilat po identifikohet perioda nga viti 1989 e këndej. Në këtë ligj duhet qartë të thuhet se prokurorë nuk mund të jenë ata juristë që kanë zbatuar ligjet sipas të cilave janë shkelur të drejtat elementare njerëzore si e drejta e të shprehurit, e organizimit dhe e protestës. Nuk mund, ne këtu në kuvend, të miratojmë një ligj që i favorizon ish-të burgosurit dhe një tjetër si ky, që po shqyrtojmë sot, që i favorizon juristët e ish-regjimit që i kanë dënuar njerëzit për teke politike dhe nacionale. Ata që kanë dënuar në kohën e Rankoviçit, Titos, e udhëheqjes kolektive jugosllave nga viti 1944 deri në vitin 1989 nuk kanë qenë aspak më të butë se sa regjimi i Millosheviqit kundër qytetarëve të Kosovës.

Se është fjala pikërisht për favorizimin e kategorive të juristëve që kanë marrë pjesë në regjimet e kaluara dhe se u kufizohet mundësia për të ardhur në shprehje juristëve të kualifikuar gjatë viteve 90-të dhe tash viteve të pasluftës, flet më së miri pika 3 e nenit 25 si dhe nenin 45 (Ngritja në detyrë) sipas të cilit kandidatët  (për prokurorë - v.ime) të kenë 3 vjet përvojë, për detyrën e prokurorit komunal, shtatë vjetë për detyrën e prokurorit të qarkut dhe dhjetë vjetë për prokurorin e Kosvoës. Praktikisht kuadrove nga koha e tashme u mbyllet dera edhe për nja 5 vjetë të mira vetëm për të përjetësuar ata që patën punuar më herët.

Propozimi i LPK-së është që për secilin vend pune në prokuroritë përkatëse të kërkohet një përvojë pune 2 vjeçare, ndërsa ky ligj të rishqyrtohet edhe një herë pas 7 ose 10 viteve. Në Kosovën e pasluftës kushti për përvojë pune për këtë detyrë edhe për disa vite nuk mund të jetë kriter për këto vende pune. Edhe ashtu edhe kështu ky ligj duhet të rishikohet për shkak të rishikimit të raproteve të gjyqësisë së Kosovës me administratën e UNMIK-ut (shih nenin 59).

Të gjithë e dijmë se një nga gjeneratorët e pakënaqësive të qytetarëve në Kosovës ka qenë fusha e drejtësisë dhe pikërisht fakti se ajo nuk është reformuar në kuptimin e ndërrimit të atyre që kanë qenë të inkriminuar.